'अर्थपूर्ण जीवनाचा समाजात शोध' घेण्यासाठी २००६ साली डॉ. अभय आणि डॉ. राणी बंग यांनी तरुणांसाठी विकसित केलेली शिक्षणप्रक्रिया म्हणजे 'निर्माण'...

समाजात सकारात्मक बदल घडवून आणण्यासाठी विविध समस्यांचे आव्हान स्वीकारणा-या व त्याद्वारे स्वत:च्या आयुष्याचा अर्थ शोधू इच्छिणा-या युवा प्रयोगवीरांचा हा समुदाय...

'मी व माझे' याच्या संकुचित सीमा ओलांडून,त्यापलीकडील वास्तवाला आपल्या कवेत घेण्यासाठी स्वत:च्या बुद्धीच्या,मनाच्या व कर्तृत्वाच्या कक्षा विस्तारणा-या निर्माणींच्या प्रयत्नांचे संकलन म्हणजे "सीमोल्लंघन"!

गेल्या तीन महिन्यातील निर्माणींच्या धडपडींचे थोडक्यात पण नेमके वृत्त आपल्यासाठी घेऊन येतील अमोल amolsd07[at]gmail[dot]com आणि सतीश गिरसावळे girsawale.sg[at]gmail[dot]com व सीमोल्लंघन टीम!

निर्माणबद्दल अधिक माहितीसाठी - http://nirman.mkcl.org; www.facebook.com/nirmanforyouth

Sunday, 11 August 2013

सीमोल्लंघनासाठी उत्तराखंडची हाक !


१६ जूनच्या उत्तराखंडच्या विध्वंसक पुरात मोठ्या प्रमाणात जीवित आणि वित्त हानी झाली. दरड कोसळल्याने आणि एकूणच पायाभूत सुविधांच्या हानीमुळे अनेक गावांचा संपर्क तुटला. या आपत्कालीन परिस्थितीला प्रतिसाद म्हणून अर्पण, मैत्री आणि i2h या स्वयंसेवी संस्थांमार्फत महाराष्ट्र व राजस्थानमधील ५ डॉक्टरांची टीम २५ जून ते १३ जुलै या पहिल्या टप्प्यात वैद्यकीय सेवा देण्याकरिता गेली होती. या टीमने या कालखंडात २२ हून अधिक गावांत वैद्यकीय शिबीरे घेतली. या शिबिरांत १००० हून अधिक रुग्णांचा उपचार केला गेला. तसेच अंगणवाडी सेविका, आशा या ग्रामआरोग्यसेविकांना त्यांच्याजवळ उपलब्ध असणाऱ्या उपकरणांच्या सहाय्याने रुग्ण तपासण्यात व उपचार करण्यात मदत केली. तसेच गिरी-प्रेमी संस्थेच्या कार्यकर्त्यांना एलागढ येथे तात्पुरत्या स्वरूपाचा पूल उभारण्यात मदत केली. कांज्योटी येथे येथे १२ कुटुंबे अडकून असल्याचे या टीमला लक्षात आले. अधिकाऱ्यांना सूचना देऊन यां कुटुंबांची सुटका करण्यात आली. या टीमने तवाघाट येथे अडकलेल्या लोकांची व सैन्यातील अभियंत्यांची सुटका करण्यासाठी रोप-वे उभा करण्यात मदत केली. वैद्यकीय मदत पोहोचू शकली नाही अशा १३ दुर्गम गावांत ही टीम पोहोचू शकली.
या टीमचा भाग असणारा डॉ. प्रियदर्श तुरे (निर्माण २) अजूनही उत्तराखंडमध्येच आहे. निर्माणच्या युवांना आवाहन करताना तो म्हणाला, “उत्तराखंडवर ओढवलेल्या अरिष्टात १५००० पेक्षा अधिक लोकांनी जीव गमावला आहे. पूर येऊन गेल्यानंतर मदत करायला अनेक लोक होते, पण मदतकार्यासाठी रस्ते नव्हते. आता रस्ते आहेत, तर मदत करायला लोक नाहीत. पुराला दोन महिने होत आले आहेत. प्रसिद्धीमाध्यमांनी पूरावरचे लक्ष कमी केल्यानंतर हे संकट सरले अशी भावना निर्माण होताना दिसत आहे. मात्र मदत करणाऱ्या स्वयंसेवी संस्था कमी झाल्या आहेत. सरकारी यंत्रणा अजूनही अनेक भागांत नाहीच आहे. जो पाऊस या अनर्थाला निमित्त ठरला, त्या पावसाला सध्या उत्तराखंडमध्ये खूप जोर आहे. दरडी कोसळू लागल्या आहेत. तेथील लोकांना सर्वसामान्य डॉक्टर्स व स्त्रियांसाठी स्त्रीरोगतज्ञांची मोठ्या प्रमाणात गरज आहेच, पण पुरामुळे झालेल्या मानसिक आघातातून सावरण्याकरता लोकांना मानसशास्त्रज्ञ (psychologist) व मानसोपचार तज्ञ (psychiatrist) यांचीही गरज आहे. गुप्तकाशी या छोट्याशा शहरात तळ मांडून उत्तरकाशी, केदारनाथ, कालीमठ, तसेच रुद्रप्रयाग, बागेश्वर, पिथोरागढ या भागांत मदत कार्य सुरू आहे. निर्माणच्या डॉक्टरांचे व इतरही स्वयंसेवकांचे मदतकार्यात स्वागत आहे.” मदतकार्यात आपले योगदान देण्यासाठी प्रियदर्शसोबत संपर्क साधावा.


स्त्रोत- डॉ. प्रियदर्श तुरे, priyadarshture@gmail.com

No comments:

Post a Comment