'अर्थपूर्ण जीवनाचा समाजात शोध' घेण्यासाठी २००६ साली डॉ. अभय आणि डॉ. राणी बंग यांनी तरुणांसाठी विकसित केलेली शिक्षणप्रक्रिया म्हणजे 'निर्माण'...

समाजात सकारात्मक बदल घडवून आणण्यासाठी विविध समस्यांचे आव्हान स्वीकारणा-या व त्याद्वारे स्वत:च्या आयुष्याचा अर्थ शोधू इच्छिणा-या युवा प्रयोगवीरांचा हा समुदाय...

'मी व माझे' याच्या संकुचित सीमा ओलांडून,त्यापलीकडील वास्तवाला आपल्या कवेत घेण्यासाठी स्वत:च्या बुद्धीच्या,मनाच्या व कर्तृत्वाच्या कक्षा विस्तारणा-या निर्माणींच्या प्रयत्नांचे संकलन म्हणजे "सीमोल्लंघन"!

गेल्या तीन महिन्यातील निर्माणींच्या धडपडींचे थोडक्यात पण नेमके वृत्त आपल्यासाठी घेऊन येतील अमोल amolsd07[at]gmail[dot]com आणि सतीश गिरसावळे girsawale.sg[at]gmail[dot]com व सीमोल्लंघन टीम!

निर्माणबद्दल अधिक माहितीसाठी - http://nirman.mkcl.org; www.facebook.com/nirmanforyouth

Sunday, 11 August 2013

मेळघाटच्या मुलांसाठी काटकुंभमध्ये जीवनशिक्षण शिबीर

डॉ. प्रियदर्श तुरे (निर्माण २) मेळघाटमधील काटकुंभ प्राथमिक आरोग्य केंद्रात वैद्यकीय अधिकारी म्हणून कार्यरत आहे हे आपण जाणतोच. मेळघाटमध्ये एकूणच शिक्षणाची गुणवत्ता कमी असल्याचे त्याला जाणवत होते. उन्हाळ्यात शेतीची फारशी कामे नसल्यामुळे ही वेळ साधून मुलांना जीवनोपयोगी शिक्षण मिळावे या उद्देशाने प्रियदर्श व मित्रमंडळींनी काटकुंभमध्ये एका शिबीराचे आयोजन केले होते.
या शिबिरात १०-१२ गावांतील सुमारे १०० मुलामुलींनी सहभाग नोंदवला. शिबिराच्या पहिल्या टप्प्यात मुलांचे इंग्रजी सुधारणे व व्यक्तिमत्व विकास यावर भर देण्यात आला. ९वी ते १२वीच्या मुलामुलींची लैंगिक शिक्षणावर ४ सत्रे घेण्यात आली. मुलांची व मुलींची ३ सत्रे वेगवेगळी झाली. चौथ्या सत्रात त्यांनी समोरासमोर आपल्या मनातले प्रश्न मांडले. याखेरीज शिबिरादरम्यान मुलांनी दवाखाना, पोस्ट ऑफिस यांना भेट देऊन त्यांची कार्यपद्धती समजून घेण्याचा प्रयत्न केला.
शिबिराच्या दुसऱ्या टप्प्यात ACP श्रीकांत देशमुख यांच्या पुढाकाराने हनुमान व्यायाम प्रसारक मंडळाने अमरावतीमध्ये मुलींना १० दिवस कराटेच्या माध्यमातून आत्मसंरक्षणाचे धडे दिले. यासोबतच पोहणे, इतर मैदानी खेळ, शिवणकला, हस्तकला इ. विषयही घेण्यात आले.

स्त्रोत- डॉ. प्रियदर्श तुरे, priyadarshture@gmail.com

No comments:

Post a Comment