'अर्थपूर्ण जीवनाचा समाजात शोध' घेण्यासाठी २००६ साली डॉ. अभय आणि डॉ. राणी बंग यांनी तरुणांसाठी विकसित केलेली शिक्षणप्रक्रिया म्हणजे 'निर्माण'...

समाजात सकारात्मक बदल घडवून आणण्यासाठी विविध समस्यांचे आव्हान स्वीकारणा-या व त्याद्वारे स्वत:च्या आयुष्याचा अर्थ शोधू इच्छिणा-या युवा प्रयोगवीरांचा हा समुदाय...

'मी व माझे' याच्या संकुचित सीमा ओलांडून,त्यापलीकडील वास्तवाला आपल्या कवेत घेण्यासाठी स्वत:च्या बुद्धीच्या,मनाच्या व कर्तृत्वाच्या कक्षा विस्तारणा-या निर्माणींच्या प्रयत्नांचे संकलन म्हणजे "सीमोल्लंघन"!

गेल्या तीन महिन्यातील निर्माणींच्या धडपडींचे थोडक्यात पण नेमके वृत्त आपल्यासाठी घेऊन येतील अमोल amolsd07[at]gmail[dot]com आणि सतीश गिरसावळे girsawale.sg[at]gmail[dot]com व सीमोल्लंघन टीम!

निर्माणबद्दल अधिक माहितीसाठी - http://nirman.mkcl.org; www.facebook.com/nirmanforyouth

Saturday, 25 January 2014

(सोशल ऑलिम्पियाड मधून) छोटे घडत आहेत


MKCL व निर्माणने मिळून सुरु केल्लेल्या महाराष्ट्र सोशल ऑलिम्पियाड च्या पायलट प्रकल्पाला सुरुवात होऊन ६ महिने झाले आहेत. शालेय वयोगटाच्या मुलांमध्ये सह्कारवृत्ती, सामूहिक नेतृत्वगुण व बुद्धिमत्तेच्या विकासाद्वारे समाजातील प्रश्नांना सामोरे जाण्याची दृष्टी व कृतीची रुजवणूक करण्याचा हा अभिनव उपक्रम आहे. या पायलट प्रकल्पामध्ये पुणे व बीड या जिल्ह्यातील विविध भागातून वेगेवेगळ्या पार्श्वभूमीच्या एकूण २० संघांनी आपला सहभाग नोंदवला.
आपल्या परिसरातील लहान मोठे प्रश्न ओळखणे व आपल्या परीने ते प्रश्न सोडवण्याचा प्रयत्न करणे किंवा आपल्या सभोवतालीच्या परिस्थितीमध्ये सकारात्मक बदलासाठी प्रयत्न करणे हे या संघांकडून प्रामुख्याने अपेक्षित होते. याअंतर्गत मुलांनी जे कृतीकार्यक्रम केले. काहींनी कचरा व त्यासंबंधित समस्यांबाबत लोकांशी संवाद साधला, आपल्या परिसरातील ओला व सुका कचरा वेगळा गोळा होण्यासाठी योजना राबवल्या, फटाके वाजवणे टाळले, पर्यावरण रक्षणाचा विचार पसरवण्यासाठी वेगवेगळे अभिनव उपक्रम राबवले, विज्ञानाचे प्रयोग स्वतः शिकून ते इतर मुलांसमोर प्रदर्शित केले, शाळेमध्ये व परिसरात स्वच्छता राखण्यासाठी तसेच शौचालये उभारणीसाठी आग्रह धरला व त्यासाठी प्रत्यक्ष कामाला सुरवात केली, आपल्या परिसरातील इतर लहान मुलांच्या सर्वांगीण विकासासाठी उपक्रम घेतले, शिकवण्या घेतल्या इ. या संघांना मदत करण्यासाठी त्यांचे स्थानिक मार्गदर्शक व पुणे येथील प्रफुल्ल वडमारे (निर्माण ५) व निर्माणचे इतर युवा सक्रीय आहेत.
या सर्व कृतींचा आढावा घेण्यासाठी सहभागी संघ येत्या १४ फेब्रुवारी रोजी पुणे येथे एकत्रित येतील व आपल्या अनुभवाचे सादरीकरण करतील. सोशल ऑलिम्पियाडचे प्रमुख मार्गदर्शक विवेक सावंत व डॉ.अभय बंग या कार्यशाळेला उपस्थित राहून मुलांचा उत्साह वाढवतील व मार्गदर्शन करतील. सोशल ऑलिम्पियाडच्या प्रयोगासाठी प्रफुल्ल आणि सहकारी, तसेच पायलट प्रयोगात सहभागी झालेल्या संघांना शुभेच्छा!!
स्त्रोत : प्रफुल्ल वडमारे, prafulla.wadmare@gmail.com

1 comment: